కండ్లకలక వ్యాధి - కారణాలు, లక్షణాలు, జాగ్రత్తలు

కండ్లకలక (కంజంక్టివైటిస్) వైరస్ లేదా బ్యాక్టీరియా వల్ల వస్తుందని వైద్య నిపుణులు తెలిపారు. కళ్లు ఎర్రబడటం, దురద, నీరు కారడం వంటి లక్షణాలు కనిపిస్తాయని వారు వివరించారు. ఈ వ్యాధి ఒకరి నుంచి మరొకరికి త్వరగా వ్యాప్తి చెందుతుందని వైద్యులు హెచ్చరించారు. కళ్లను తరచూ శుభ్రమైన నీటితో కడుక్కోవాలని, వ్యక్తిగత టవల్, రుమాలు ఇతరులతో పంచుకోవద్దని సూచించారు. కళ్లకు చేతులతో తాకడం మానుకోవాలని, లక్షణాలు కనిపిస్తే వెంటనే వైద్యుడిని సంప్రదించాలని నిపుణులు సలహా ఇచ్చారు. ఇంటి చిట్కాలుగా చల్లటి నీటి కాపడం పెట్టుకోవడం ఉపశమనం ఇస్తుందని కొందరు వైద్యులు తెలిపారు. వైద్యుల సూచన మేరకు మందులు వాడాలని, స్వీయ వైద్యం చేసుకోవడం మంచిది కాదని పేర్కొన్నారు.